Bukinistët

Bukinistët e vjetër shesin libra

ndanë rrugëve dhe Lanës që turbull rrjedh

nën diell ngrohen klasikët me rrëfenjat e tyre

për moralin e njerëzit e këqij

që përfundojnë në ferr

Përhumbshim klasikët rrinë pranë njeri-tjetrit

larg mërive që ndoshta patën në gjallje

i strukur Marksi mes Frojdit dhe Frommit

pak më poshtë Le Bon flet për “Psikologjinë e turmave”

tërë ngjyra librat e pasioneve

preh e lehtë për studentët dhe vajzat çapkëne

që s’harrojnë të lexojnë për dashurinë

me dhjetëra tituj kryqëzohet Nicholas Sparks

me Danielle Steel

Arti i të qeverisurit të botës

i ardhur rishtazi nga lozhat masoniste

kryqëzohen me artet e revolucionit

perioda të dikurshme të literaturës marksiste

Kujtime, kujtime kaq shumë kujtime

aq sa bukinistët s’dinë ç’të reklamojnë

veteranë të vjetër kujtojnë shokët

dhe qindra poetë baritorë

Bukinistët e vjetër shesin libra
njerëzit i blejnë si ushqim i përditshëm ditor

 të mbështjellë me qese, gjithë  merak

ndodh që “Luli i vocërr” real u pret rrugën

por dorën në xhep se fusin aspak

në shtëpi të tyre punësojnë me dhjetëra “Pjereta”

tu bëjnë punët ditore,

Balzakun lexojnë me ëndje

por s’ harrojnë asnjëherë,

 gjuhën ta përdorin në mënyrën urdhërore

tubohen çdo festë  te bustet e Frashërillinjve

 djalosha që veten e quajnë Gavrosh

e kanë të kotë që përpiqen

të zgjojnë një botë që është bosh

një botë që vrapon si e marrë

pas titujve “Si të bëhesh i pasur për një vit”

“Peliçet e zonjave të para të Amerikës”

“Seksi dhe qyteti” e “Dashnori i pashpirt”

Bukinistët e vjetër shesin libra,

kulturë që si rroba të lara nderet buzë rrugës

për ta veshur të nesërmen çdo kalimtar

gaz, mjerim, dashuri dhe dhimbje

një botë ,që tjetrës i bën varrë.

Tiranë 3.12.2011