Helmim i gjuhës politike evropiane

Nuk mund të ma merrte mendja ndonjëherë që gjuha politike e Tiranës mund të arrinte dhe kontaminonte dhe ajrin dhe natyrën e Marsejës. Ky mosbesim rrjedh më tepër jo vetëm nga naiviteti ynë politik dhe besimi i patundur se në Evropë nuk mund të ndodhin shpërdorime të tilla të fjalorit politik por më tepër se nga Marseja jemi mësuar të na vijë aromë shqiptarie nga grupi i tifozëve që mbështesnin lojtarin tonë të kombëtares, Canën kur ai luante në radhët e Olimpikut të Marsejës dhe aroma e sapunit të famshëm që bën që  rrobat tona të vijnë erë të mirë. Pak ditë më parë kryetari i asamblesë së Partive të djathta evropiane, ish-fermeri Joseph Daul i shndërruar në politikan deklaroi se shefi i opozitës shqiptare është një “i sëmurë mendor që ka bllokuar procesin e integrimit të Shqipërisë”. Kjo deklaratë , kaq naive dhe e papërgjeshme në të njëjtën kohë  nga një njeri që u thirr dhe për të zgjidhur krizën shqiptare, para se të gëzojë njerëz këtu në Tiranë që mundohen që dështimet e tyre në ekspertizë dhe politikëbërje ti faturojnë tek të tjerët duhet të na trishtojë të gjithëve. Së pari sepse është një fyerje për gjithë klasën politike shqiptare që qoftë dhe tërthorazi del se është e paaftë mendërisht, pasi populli shqiptar ka një fjalë të urtë që thotë “më thuaj me kë rri të të them se cili je”.Në këto 6 vjet qeverisje disa arritje si MSA, NATO,liberalizim vizash etj janë arritur sëbashku dhe në këtë bashkëpunim të kërkuar dhe aq shumë nga ndërkombëtarët përfshi dhe zotërinë në fjalë, të dyja palët kanë përfituar nga “marrëzia” e njëri-tjetrit. Së dyti, ky deklarim ngre shumë pikëpyetje për seriozitetin e atyre që merren me çështjet shqiptare dhe motorët lëvizës pas tyre që bëjnë të tilla deklarata. Në fakt, Marseja për shqiptarët njihet si fole intrigash nga romani i famshëm i Aeksandër Dymasë(atit) “Konti MonteKristos”, por atyre u duhet tashmë që përveç këtij konstatimi të mësojnë mbi të gjitha se kush janë Danglarët që paguajnë për të thënë gjëra të tilla apo Kaderusët që shkruajnë akuzat me dorë të majtë për të mos u kuptuar dhe për më tepër dhe burimin e këtyre parave të Danglarëve që me origjinën e tyre të pisët po kontaminojnë dhe gjuhën politike të partive të djathta evropiane.