GJITHÇKA PËR KOSOVËN

Më 7 qershor 2014, në sallën Unesco të Muzeut Historik Kombëtar, u shfaq premiera e filmit dokumentar "Gjithçka për Kosovën-Ramush Haradinaj". Ky film u realizua sipas skenarit të Enver Kushit, drejtor fotografie, Spartak Papadhimitrin, nën drejtimin e regjisorit të njohur Kujtim Gjonaj, Mjeshtër i Madh. Për realizimin e këtij projekti kinematografik u desh bashkëpunimi i presidentit të shtëpisë filmike “EUROLIZA”, Z. Sutki Hulaj, me shtëpinë e librit dhe të filmit “BOTA SHQIPTARE” me producent Z. Genti Gjonaj.

 Ramush Haradinaj, në dokumentar shfaqet jo vetëm si një luftëtar i pamposhtur, por edhe si një politikan largpamës dhe burrë shteti i mençur. Me mënyrën se si rrëfen heroizmin e të rënëve, gjeneral Ramush Haradinaj, krijon tablo reale lufte, plot ngjyra heroizmi dhe patriotizmi. Sëbashku me heroizmin del në pah dhe formimi intelektual i Ramush Haradinaj, lidhjet dhe njohjet e tij me shqiptarizmin dhe kulturën kombëtare duke i përcjellë shikuesit një tablo të plotë një heroi modern së Kosovës së sotme.

Në fokus të filmit dokumentar është familja Haradinaj, që i dha luftës gjakun e tre djemve; Luanit, Shkëlzenit dhe Enverit, si edhe një komandant trim si Ramush Haradinaj, i cili bëri emër dhe ka lënë gjurmë të rëndësishme në historinë e luftës çlirimtare të popullit të Kosovës. Në minutazhin e filmit përshkruhet epopeja heroike e luftëtarëve të UÇK-së, kundër pushtuesit serb, të cilët nën udhëheqjen e komandant Ramush Haradinajt, u hodh në luftë për të shporrur zgjedhën e huaj. Lufta e Ushtrisë Çlirimtare të Kosovës merr një rëndësi të madhe, sepse përfundoi me fitoren e shqiptarëve. Në këtë fitore ndaj sundimit serb të Milosheviçit, një kontribut të shquar ka komandanti legjendar Ramush Haradinaj. Është e para luftë në historinë modern të kombit shqiptar që përfundon me sukses duke pasur një efekt të menjëhershëm në formimin e shtetit të pavarur të Kosovës.

Filmi dokumentar "Gjithçka për Kosovën-Ramush Haradinaj" është konceptuar dhe strukturuar në tre blloqe kryesore. Një udhëtim që nis nga Gllogani, pranë Deçanit, për të vijuar më pas në krahinën e Dukagjinit, Shqipëri, më pas në kryeqytetet e Europës dhe përfundon në tribunalin e Hagës.

Në bllokun e parë trajtohet roli i Ramush Haradinajt dhe i familjes së tij në luftën çlirimtare për lirinë e Kosovës.Momente të vështira, beteja, pamje nga terreni , raportime vijnë të gjitha sëbashku si sekuenca të një pas njëshme të  sagës së lirisë dhe krijojnë përshtypjen se liria nuk dhurohet por fitohet. Momenti i dytë i rëndësishëm është roli i Ramush Haradinajt si Kryeministër i Kosovës, qytetaria e tij si edhe dorëzimi vullnetar për të shkuar në Hagë e për tu përballur me drejtësinë. Ky veprim i zbardhur nga intervistat dhe përshtypjet e komunitetit ndërkombëtar i jep një çertifikatë besimi këtij akti madhor të paprecedentë në historinë e popujve në rajon. Në bllokun e tretë tretë kemi përballjen e Ramush Haradinajt me drejtësinë, triumfin e tij ndaj shpifjeve dhe akuzave, si dhe kthimin triumfal në Kosovë. Ky moment është realizuar, duke ndërtuar një episod emocional të ndërtuar artistikisht, sipas kronikave të kohës. Dorëheqja e Ramush Haradinajt është një rast unikal, që një kryeministër shkon vullnetarisht për t’u përballur me drejtësinë dhe të kthehet triumfator në vendlindje. Në të njëjtën kohë kemi dhe rrëfimet rreth jetës familiar të politikanit Haradinaj që i japin një dimension human filmit dokumentar. Në bazë të këtyre tre elementeve, shpaloset sekuencë pas sekuence, me realizëm dhe emocion, jeta dhe rrugëtimi i Ramush Haradinajt, shembulli heroik e qytetar i  të cilit është një etalon matës i shtetformimit në Kosovë dhe më gjerë në rajon.