Kjo tablo në akuarel është realizuar nga Edward
Lear(1812-1888) në prill 1857 , gjatë një udhëtimi të shkurtër në Tre
scogli-Tre shkëmbijntë, Ksamili i sotëm, në veri të Butrintit në Shqipëri.
Lear-i lundroi nga Korfuzi, ku kish zënë me qira një shtëpi gjatë periudhës së
dimrit , për në bregun përballë.
Në librin e vet Corfu Years-Vitet e Korfuzit, (Athens and
Dedham,1988, fq 108), Lear shkruan. "Ne filluam të lundrojmë jashtë
Korfuzit në datën 2 prill me varkën e tipit Midge* të Lushingtonit- Mora
George-in , kantinën ose kutinë e guzhinës, krevatin tim, letra për të vizatuar
etj. Edward-i mori shërbëtorin e tij, Fillipo, një Maltez. Lundruam shumë
qetësisht përgjatë tre orëve dhe ankoruam në një gji të vogël të Tre scogli-Tre
shkëmbijntë-shijuam gjithë pasditen duke bërë vizatime, poshtë shqopishtave dhe
shkurreve të gjata të gjitha të lulëzuara, hëngrëm një drekë të shijshme dhe
kaluam një natë të qetë. Bashkëudhëtari i Lear-it ishte James Bevan Edwards,
(1834-1922), më vonë oficer madhor i ushtrisë britanike dhe politikan, i cili
ishte djali i Samuel Price Edwards, një padron i arteve i afërt me Lear-in, i
cili posedonte tablo të tij si Corfu, from Ascension(1859), Petra,
teatri(1859). Turin(1862), Jerusalem(1862) etj. Edward Lear e kish realizuar
udhëtimin e tij të parë në Shqipëri në nëntor 1848.
Kjo është tabloja e parë e Ksamilit dhe si duket aty ka
qenë një natyrë e qetë. Interesant është emri Tre scogli që mesa duket i
referohet tre ishujve të vegjël. Nuk dihet nëse ky emërtim është një term që
përdornin venedikasit si zotërues të hershëm të Korfuzit dhe Butrintit, apo një
përkthim i toponimisë që përdornin vendasit. Lear-i pikturoi pejsazhe të
mrekullueshme nga Shqipëria, por në vendin tonë nuk gjendet asnjë pikturë
origjinale e tij. Sa për Ksamilin, ai është transformuar pothuajse tërësisht,
dhe privatësia e gjirit të vogël dhe shumë të këndshëm, ka humbur.
* lloj barke e vogël.
No comments:
Post a Comment